"Bank Respublika" ASC "Access Bank" QSC-nin səhmlərini almaq barədə razılığa gəlib. Əqdin bu ilin noyabrına qədər başa çatdırılması planlaşdırılır.
Bakuplus.az-ın məlumatına görə, razılaşmaya əsasən, "Access Bank"ın indiki səhmdarları "Bank Respublika"nın yeni buraxılacaq imtiyazlı səhmlərinin 25 faizini əldə edəcək və bununla da "Bank Respublika"nın səhmdarlarına çevriləcəklər.
İlkin mərhələdə hər iki bank ayrıca fəaliyyətini davam etdirəcək. Daha sonra isə tənzimləyici tələblərə uyğun olaraq onların vahid bankda birləşdirilməsi nəzərdə tutulur.
Birləşmədən sonra yeni bankın ümumi aktivlərinin təxminən 4,5 milyard manat, kredit portfelinin isə 3,3 milyard manat olacağı gözlənilir.
Bankların açıqlamasına görə, məqsəd daha böyük maliyyə imkanlarına və daha güclü bazar mövqeyinə malik bank yaratmaqdır.
