Prezident İlham Əliyev Təlim-Məşq Mərkəzini ziyarət edib. Bu haqda bu gün, 27 noyabr tarixində Bakuplus.az Prezidentin rəsmi saytına istinadən xəbər verir.
Ölkə başçısı mərkəzin əsaslı təmirindən sonra yaradılan şəraitlə tanış olub. rəqəmsal inkişaf və nəqliyyat naziri, Azərbaycan Cüdo Federasiyasının prezidenti Rəşad Nəbiyev Prezidenti müşayiət edib.
Ümumi ərazisi 2,2 hektar olan idman kompleksində qadınlar və yeniyetmələr üçün böyük idman zalı yaradılıb. Burada uzunluğu 96, eni isə 72 metr olan stadionun süni ot örtüyü də dəyişdirilib.
Əsas binada kişilər və gənc oğlanlar üçün nəzərdə tutulan məşq zalında eyni vaxtda 100 idmançı məşq edə biləcək. Mərkəzdəki bütün məşq zalları Beynəlxalq Cüdo Federasiyasının standartlarına uyğun olan tatamilərlə təchiz olunub.
Həmçinin həkim otağı, fizioterapiya və masaj otaqları idmançıların ilkin reabilitasiyası və müalicəsi üçün lazımi cihaz və avadanlıqlarla təchiz edilib.
Əsas yeniliklərdən biri isə 28 yerlik müasir hotel bölməsinin yaradılmasıdır.
Mərkəzdə çalışacaq 50-dən artıq əməkdaş üçün də əsas binada hər bir şərait yaradılıb.
Olimpiya növləri üzrə milli komandalar üçün Təlim-Məşq Mərkəzi 1967-ci ildə istifadəyə verilib. Bir vaxtlar “Neftçi” təlim-məşq bazası kimi şöhrət tapan bu idman kompleksi şəhərin mərkəzində, Azadlıq prospekti, 149 ünvanında yerləşir.
Azərbaycan cüdoçuları il ərzində bütün yaş qrupları üzrə fərdi və komandalar arasında keçirilən beynəlxalq yarışlarda ümumilikdə 233 medal əldə ediblər. Bu medallardan 73-ü qızıl, 53-ü gümüş və 107-si bürünc olub.
[URIS id=121264]
