Fövqəladə Hallar Nazirliyinin (FHN) Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyi “ASAN xidmət” mərkəzində fəaliyyətə başlayıb. Bu haqda bu gün, 2 noyabr tarixində Report məlumat verib.
İlkin mərhələdə sahibkarlar qurumun xidmətlərindən Bakıdakı 7 saylı “ASAN xidmət”də istifadə edə biləcəklər.
Mərkəz vasitəsilə sahibkarlar “Təhlükə potensiallı obyektlərin dövlət reyestrində qeydiyyatdan keçirilməsi haqqında çıxarış”ı və mülki dövriyyəsi məhdudlaşdırılan əşyaların (partlayıcı maddələr və qurğular, tezalışan maddələr və pirotexniki məmulatlar) dövriyyəsinə “xüsusi icazə” ala biləcəklər.
Bununla bağlı tədbirdə bildirilib ki, prosesin mərhələli şəkildə Bakıdakı digər mərkəzlərdə və regionlarda da tətbiqi nəzərdə tutulub. Növbəti mərhələdə göstərilən xidmətlərin sayının artırılması nəzərdə tutulur.
“ASAN xidmət” mərkəzində bu xidmətlərin göstərilməsi şəffaflığın artırılmasına, prosesin sadələşdirilməsinə və sahibkarların məmnunluğunun artırılmasına xidmət edəcək.
[caption id="attachment_77441" align="alignnone" width="640"]
Foto report.az saytı[/caption]
