Saxta tibbi rəy verən Sabunçu xəstəxanasının həkimi məsuliyyətə cəlb edilib. Bu haqda Bakuplus.az 4 iyul tarixində Baş Prokurorluğa istinadən məlumat verir.
Hərbi xidmətə yararsız olmaya dair saxta tibbi rəy verməkdə təqsirləndirilən, Sabunçu Tibb Mərkəzində şöbə müdiri vəzifəsində işləyən İlqar Qaracayev barədə cinayət işinin istintaqı aparılır.
Həkimin hərbi xidmətə yararlı olan ayrı-ayrı çağırışçıların hərbi xidmətə yararsız hesab edilmələri barədə saxta sənəd verilməsi müqabilində onlardan 18 min manatdan artıq rüşvət almasına əsaslı şübhələr müəyyən edilib.
İş üzrə toplanmış ilkin sübutlar əsasında İlqar Qaracayevə Cinayət Məcəlləsinin bir neçə maddəsi ilə ittiham elan edilib. Həkimin səhhəti və yaşı nəzərə alınmaqla barəsində ev dustaqlığı növündə qətimkan tədbiri seçilmişdir.
İstintaq davam etdirilir.
