IDEA ictimai birliyi istifadə olunmamış oyuncaqların bağışlanması üçün Bakıda “Sevincini bölüş” xeyriyyə kampaniyasına başlayıb. Aksiya çərçivəsində şəhərin müxtəlif yerlərində xüsusi ianə qutuları quraşdırılacaq, orada toplanılan oyuncaqlar xüsusi qayğıya ehtiyacı olan uşaqlara hədiyyə olunacaq. Bu haqda bu gün, 2 noyabr tarixində Bakuplus.az birliyin mətbuat xidmətinə istinadən məlumat verir.
İanə edilən oyuncaqların qəbulu üçün ilk qutu 1 noyabr tarixində Gənclik Mall-da Heydər Əliyev Fondunun vitse-prezidenti, IDEA ictimai birliyinin təsisçisi və rəhbəri Leyla Əliyevanın iştirakı ilə istifadəyə verilib.
IDEA İctimai Birliyi Bakı sakinlərini evlərində olan istifadəsiz, amma yararlı qalan oyuncaqlarını tullamaq əvəzinə IDEA-nın ianə qutularına yerləşdirməklə ehtiyacı olan uşaqlara öz yardım əlini uzatmağa, eyni zamanda həmin oyuncaqlara “ikinci həyat” verməklə təbiətə vurulan zərəri azaltmağa çağırır.
[caption id="attachment_77399" align="alignnone" width="640"]
Foto İDEA-nın rəsmi Facebook səhifəsi[/caption]
