Qeyri-rəsmi münasibətdə olduğu qadını hotelin 6-cı mərtəbəsindən atan şəxsə hökm oxunub.
Hadisə 2023-cü ilin fevral ayında Bakıdakı hotellərdən birində baş verib.
Həmin il fevralın 16-da Şükür Qənbərov 22-ci Polis Bölməsinə gələrək, qeyri-rəsmi münasibətdə olduğu qadını Rəşid Behbudov küçəsi, 59-da yerləşən hotelin pəncərəsindən atması barədə məlumat verib.
1997-ci il təvəllüdlü Sücayət İbrahimova ağır vəziyyətdə Kliniki Tibbi Mərkəzə çatdırılıb.
Nəsimi rayon prokurorluğunda qəsdən adam öldürməyə cəhd maddəsi ilə cinayət işi başlanılıb.
İstintaqla müəyyən edilib ki, fevralın 16-ı saat 19:25-da Şükür Qənbərov qeyri-rəsmi münasibətdə olduğu Sücayət İbrahimova və onun 2 azyaşlı övladı ilə birlikdə hotelə gəlib. Hotelin 6-cı mərtəbəsində yerləşən otaqda onlar intim münasibətdə olublar. Sonra tərəflər arasında qısqanclıq zəminində mübahisə düşüb. Mübahisə zəminində Qəmbərov qadının baş nahiyəsinə zərbələr vurub, sonra isə onu pəncərədən atıb. Nəticədə qadın hotelin 3-cü mərtəbəsində olan tikilinin dam örtüyünün üzərinə düşüb. Qadın hadisə yerinə çağırılmış Təcili Tibbi Yardım briqadasının müşayiəti ilə Kliniki Tibbi Mərkəzə çatdırılıb və həyatı xilas edilib.
Bakı Ağır Cinayətlər Məhkəməsinin hökmü ilə Şükür Qənbərov 8 il 6 ay müddətinə azadlıqdan məhrum olunub.
Mənbə: news24.аz
