Könül Xasıyeva İnstagram səhifəsində müraciət ünvanlayıb. Bu haqda BakuPlus.az bu gün, 24 oktyabr tarixində xəbər verir.
Xalq artisti öz müraciətində sənətçi yoldaşlarına səslənərək xəstəliyi ilə bağlı onlardan kömək istəyib.
"Zaman hər an əleyhimə işləyir. İnanıram ki, Azərbaycan səhnəsini Könülsüz qoymayacaqsınız. Ən əsası, 40 yaşımda Allahın mənə ən böyük mükafatı olan Kazımı anasız qoymayacaqsınız.
Amma boğazımda yaranan bəd xassəli şiş bütün ümidlərimi qırdı. Elə bilirəm, dünya uçub, altında qalmışam.
Amma bir ümid var ki, hələ metastaz verməyib. Vaxtında əməliyyat olunsam, yaşamaq şansım var. Almaniyada olacaq əməliyyat üçün 150.000 dollar (254 min manat) vəsait lazımdır", - müraciətdə deyilir.
Konkret.az-ın məlumatına əsasən, bu məsələ ilə bağlı jurnalist Pərviz Hüseynin yazdığı sözlər diqqət çəkib. Belə ki, jurnalistin iddiasına görə, Könül Xasıyevanın bir neçə evi var, onları sataraq müalicəsinə pul ayıra bilər:
“Könül Xasıyevanın neçə evi var, birini satsın, əməliyyat olunsun. Hər dəfə camaatdan pul yığır. Keçən dəfə də xəstəlik adı ilə pul yığıb, sonra oğlu Kazıma 2 minə it almışdı. Hələ yazıb ki, sənət yoldaşlarım, bircə toyun pulunu kartıma köçürsəniz, sağalaram. Niyə də? Allah şəfa versin, o ayrı. Amma bu qədəri də ifratdır, hər şeyin təhəri var”.
