Bu gün Nərimanov Rayon Məhkəməsində hakim Gültəkin Əsədovanın sədrliyi ilə "Baksol yolu" adlanan ərazidə yolun çökməsi nəticəsində kanalizasiyaya düşüb həyatını itirən 28 yaşlı Cümşüd Cümşüdlü ilə bağlı başlanmış cinayət işi üzrə həbs olunmuş Bakı Su Kanal İdarəsinin kanalizasiya kollektorları və təzyiq xidmətlərində qəza-bərpa üzrə sahə rəisi Azər Cümşüdovun məhkəmə prosesi keçirilib.
Lent.az xəbər verir ki, məhkəmə dövlət ittihamçısının və vəkillərin təqsirləndirilən Azər Cümşüdova verilən sualları ilə davam edib. Azər Cümşüdov bildirib ki, özünü günahkar hesab etmir: "Biz o ərazidən təxminən 800 metr aralıda iş görmüşük. Məlumat gəlmişdi ki, çökmə baş verib, gedib oranı lentlə çəpərlədik, şəkillərini çəkdik. İyun ayının 14-nə kimi burada bərpa işlərimiz davam edib. Kosmetik bərpa işini biz etməmişik. Hadisədən 22 gün əvvəl rəhbərlik bizi oradan çıxartdı ki, daha sizlik bir iş yoxdur burada. Baş verən ölüm hadisəsinin cavabdehi istismar sahəsidir. Mən gedib orada gözətçilik edəsi deyildim ki! Əgər zərrə qədər günahkaramsa, cəzamı onqat çəkməyə hazıram".
Zərərçəkən Fəridə Abbasova isə bunları deyib: "Ürəyi dağlı bir ananın yanına gəlmək yerinə dəfn gününün sabahı "Azərsu"yun sabiq vəzifəli şəxsi olan qaynım Novxanıdakı bağ evində yeyib içiblər. Guya mənim oğluma üç mərasimi verirmişlər. Mən də həmin vaxt təkbaşıma oğlumun məzarı başında yana-yana ağlayırdım. Qaynımgil indiyənə kimi bu işi ictimailəşdirdiyimə görə mənə hədə-qorxu gəlirlər. Sukanal idarəsindən İntiqam kimdirsə, qaynımla mənə xəbər göndərib ki, nə xeyri var bu qədər hay-küy salmağının? Onsuz da uduzan sən olacaqsan, yazığın birini tutub ilişdirəcəklər, sən küy salmağında qalacaqsan. Mən oğlumun damla qanının hesabını soruşacağam".
Növbəti proses 17 fevral saat 10:00-a təyin olunub.
