"Əgər özəl tibb müəssisəsi hüquqi şəxs yaratmaqla təşkil olunubsa, (yəni MMC, QSC, MMM və s.) bu zaman sahibkarlıq subyektinin məkanında fəaliyyət göstərən həkim lisenziyaya görə cavabdeh şəxs hesab edilmir".
Bu fikirləri "Sağlam radio"nun (93 FM) "Sağlam səhər" efirində Səhiyyə Nazirliyi Analitik Ekspertiza Mərkəzinin Tibbi nəzarət şöbəsinin baş mütəxəssisi Xəyalə Əliyeva açıqlayıb.
Onun sözlərinə görə, lisenziya hüquqi şəxs yaratmış sahibkarlıq subyektinin tam olaraq öz məsuliyyət sferasıdır: "Doğrudur, sahibkarlıq subyektinin rəhbər nümayəndəsi öz işçi heyəti ilə vaxtaşırı keçirdiyi iclaslarda və ya daxili auditində tabeliyində çalışan əməkdaşlarını öz vəzifə səlahiyyətlərindən kənar fəaliyyətlə məşğul olmaması üçün xəbərdar etməlidir. Çünki hansısa bir həkimin orada lisenziyadan kənar fəaliyyəti sahibkarlıq subyektinə maliyyə sanksiyası və ya daha ciddi məhdudlaşdırıcı tədbirlərə tətbiq edilə bilər. Əgər məlumatlı deyillərsə, o zaman məsuliyyət tədbiri sahibkarlıq subyekti ilə işçi arasında bağlanmış müqavilənin şərtləri ilə tənzimlənməlidir".
Xəyalə Əliyeva bildirib ki, qanunvericiliyə gəldikdə isə lisenziyaya görə birbaşa məsuliyyət sahibkarlıq subyektinin məsuliyyətidir: "Bəzən ümumiyyətlə lisenziya almadan tibb fəaliyyəti ilə məşğul olan sahibkarlıq subyekti obyektin bəzi otaqlarını icarəyə verərək, digər şəxslərin də yalnız vergi ödəməklə fəaliyyətini təmin edir. Belə hal aşkarlandığı zaman əmək müqaviləsi olmadığına görə hər iki şəxs sahibkar hesab olunduğundan lisenziyaya görə məsuliyyət daşımış olur. Həkim olaraq lisenziyaya məsuliyyət yalnız fərdi qaydada tibbi fəaliyyət göstərən şəxslərə şamil olunur. Hüquqi şəxs yaratmadan, (yəni müəyyən cəmiyyət - MMC, QSC, MMM və s.) həm həkim həm də sahibkar kimi fəaliyyət göstərirsə, hər iki sənəd eyni şəxsə məxsusdursa, məsul şəxs hesab edilir və hər bir halda cavabdehdir.
Beləliklə sahibkarlıq subyektinin əmək müqaviləsi əsasında çalışan işçiləri lisenziyaya görə birbaşa məsuliyyət daşımırlar".
