Həbsxanaya telefon keçirmək üçün köməklik göstərən əməkdaş məhkəməyə verilib. Bu haqda bu gün, 30 yanvar tarixində Bakuplus.az “Qafqazinfo”ya istinadən xəbər verir.
Bakı İstintaq Təcridxanasında saxlanılan dustaqlara nəzarət edən Elşad Məmmədov barəsində ittiham qaldırılıb.
Belə ki, R.Məmmədov nəzarətçi kimi işlədiyi həbsxanada telefonları və nömrələri yoxlamadan kənar olaraq cəza çəkən şəxslərə verib. O, xidmətlərinin qarşılığında dustaqların yaxınlarından rüşvət alıb. Onun bank hesabına müxtəlif vaxtlarda rüşvət kimi ümumilikdə 416 AZN pul göndərilib.
Məmmədov ittihamla bağlı özünü qismən təqsirli bilib və əməlindən peşman olduğunu deyib. Ancaq rüşvət aldığını etiraf etməyib:
“Mənim kartıma atılan pullar özümündür, heç kim rüşvət verməyib. Təcridxanada cəza çəkən şəxslərə siqaret, yağ və başqa lazımi şeyləri alıb verirdim. Yaxınları da aldığım şeylərin pulunu kartıma göndərirdilər”, – deyə o qeyd edib.
Proses 12 fevral tarixində davam edəcək.
