Bakının Sabunçu rayonunun Maştağa qəsəbəsində yerləşən Şahmar Ələkbərov küçəsində ciddi problemlər yaranıb.
Bakuplus.az-a müraciət edən sakinlərin bildirdiyinə görə, küçədə yerləşən 10-15 ev tamamilə suyun içində qalıb.
Yağan yağışlardan sonra yaranan vəziyyət nəticəsində əraziyə toplanan su çəkilmir və bu da gündəlik həyatı iflic edib. Sakinlər evlərinə daxil olmaqda çətinlik çəkir, bəzi hallarda isə ümumiyyətlə giriş mümkün olmur.
Vətəndaşlar bildirir ki, oxşar hal ilk dəfə yaşanmır və hər dəfə yağıntılı havalarda eyni vəziyyət təkrarlanır.
Hazırda sakinlər vəziyyətin aradan qaldırılması və küçədə suyun çəkilməsi üçün təcili tədbirlər görülməsini tələb edirlər.
