Bakı Apellyasiya Məhkəməsində dələduzluqda təqsirləndirilən Pərvin Əsədovun (soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Habil Məmmədovun sədrliyi ilə keçirilən prosesdə qərar elan edilib.
Qərara əsasən, apellyasiya şikayəti təmin edilməyib.
İttihama görə, Pərvin Əsədov etibardan sui-istifadə edərək və aldadıcı vədlər verməklə zərərçəkmiş Zəranə Səmədovaya (adı, soyadı şərtidir) məxsus pul və əmlakı ələ keçirib. O, zərərçəkmiş şəxsin etimadını qazanmaq üçün müxtəlif sahələrdə köməklik göstərəcəyini vəd edib. Bu vədlərə Zəranənin anasının məzar daşlarının hazırlanması, Bakı və Xırdalanda yerləşən yaşayış evlərinin onun adına sənədləşdirilməsi, Binəqədi rayonunda Neft şirkətinə məxsus torpaq sahəsinin alınması və həmin ərazidə ev tikilməsi, eləcə də 2022-ci ildə Binəqədi bələdiyyəsində işə düzəldilməsi kimi yalan vədlər daxil olub.
Həmçinin Pərvin Əsədov Dağıstan Dövlət Universitetində təhsil aldığı üçün diplomunun alınmasına yardım edəcəyini bildirərək Zəranəni aldatmağa davam edib. Aldatma yolu ilə o, 2021-ci ilin noyabrından 2022-ci ilin iyul ayınadək müxtəlif tarixlərdə zərərçəkmişdən hissə-hissə olmaqla böyük məbləğdə vəsait alıb.
Qeyd olunur ki, təqsirləndirilən şəxs qadından ümumilikdə 7 000 manat, sonrakı günlərdə 1 000 manat, daha sonra 3 000 manat, mobil tətbiq vasitəsilə kart hesabına 1 070 manat, yenidən 3 000 manat və həmin dövrün məzənnəsi ilə 1 360 manat dəyərində 800 ABŞ dolları əldə edib.
Bundan əlavə, o, 2022-ci ilin əvvəlində 600 manat dəyərində qızıl sep, dayısına hədiyyə adı ilə 1 000 manat, anasının əməliyyatı üçün 3 500 manat, eləcə də həmin ilin fevral–iyul aylarında qadının evində hissə-hissə olmaqla 8 000 manat, 3 000 manat və 1 276 manat dəyərində 700 avro məbləğində vəsaiti də dələduzluq yolu ilə əldə edib.
Müəyyən edilib ki, təqsirləndirilən şəxs bütün bu hərəkətləri vahid niyyətlə həyata keçirərək ümumilikdə 33 806 manat məbləğində zərər vurub.
Nərimanov Rayon Məhkəməsinin hökmü ilə Pərvin Əsədov 1 il 11 ay 26 gün müddətə azadlığın məhdudlaşdırılması cəzasına məhkum edilib.
