"Elgizlə izlə" verilişində Əməkdar artist İlkin Əhmədovla aparıcı Elgiz Əkbər arasında mübahisə yaşanıb.
Axsam.az-ın məlumatına görə, buna səbəb İlkinin şəxsi həyatını gizli saxlamağa çalışması ilə bağlı olub. Elgiz isə bunu ona irad tutub.
İlkin bunu muğam ifaçısı olmağı ilə əlaqələndirib:
"Muğam ifaçılarının danışıqlarında, işlətdikləri ifadələrdə, davranışlarında bir balaca da olsa nöqsan olmamalıdır. Abrımızı qoruyuruq. Çox şeyi deyə bilmirik, amma demək lazımdır".
Elgiz onun açıqlamasına belə reaksiya verib:
"Sən məgər pis adamsan? Mən səni ictimaiyyətə açıqsözlü biri kimi tanıyıram. Sual verirlər ki, niyə o müğənniləri efirə çağırırsınız? Dövlət və özəl kanallar var. Dövlət kanallar sponsorlardan asılı deyil. Bura isə özəl telekanaldır, biz asılıyıq..."
İlkin Elgizin sözünü kəsməyə çalışıb. Aparıcı İlkinə "Bacarırsan, reytinq ver. Sənət, oxumaq, yaraşıq, sənət səndə" deyə, bildirib.
İlkin isə cavabında "Mən reytinq verirəm" deyə, qeyd edib.
Daim gündəlik başına gələnlərdən söz açan Elgiz burada heç bir qəbahət olmadığını deyib:
"Sual verirlər ki, məsələn, Mənzurə Musayevanı niyə tez-tez çağırmırsınız. Gözəl səsi var. O, "duzdur", səmimidir. Bax, burada olanlar, danışdınız, zəriniz töküldü? Məndən çox özündən danışan adam var? Yaşadıqlarımı danışıram, hamı da paylaşır. Amma eyni Elgizəm...".
İlkin yenidən Elgizin sözünü kəsərək "Söhbət Mənzurəkimilərdən getmir. Mən başqa şeydən danışıram. Efirlərdə bayağı mahnı oxuyanlardan, geyinənlərdən söhbət gedir" deyə, vurğulayıb.
Elgiz fikrini belə tamamlayıb:
"Bizim müzakirə etdiyimiz mövzular həyatda qarşılaşdığımız hadisələrdir. Bu adamlar "lal balıq" olmamalıdırlar, vətəndaş mövqelərini ortaya qoymalıdırılar. Dava demirəm, amma verilişlərdə həyat hekayənizdən, yaşadıqlarınızdan danışasınız. Qorxmayın".
