Nərimanov rayonunda mağaza sahibkarları bir araya gələrək şikayətlərini bildiriblər. Bu haqda 10 mart tarixində İTV məlumat verib.
Nərimanov RİH-nin qarşısında 31 obyekt sahibi bir araya gələrək şikayətlərini bildiriblər. Onların oktyabrın 16-sında Nərimanov metrosunun yanında mağazaları yanıb. Həmin hadisədən 4 aydan çox keçsə də, sahibkarlar hələ də işə başlaya bilməyiblər. Buna səbəb köhnə obyektlərin yerində inşa edilən yeni binanın birinci mərtəbəsinin tikilməsindən sonra işlərin dayanmasıdır. Hazırda heç bir işdə işləməyən şikayətçilər işin uzanmasından narahatdırlar.
Sahibkarları Nərimanov RİH-in başçısı Elgin Həbibullayev qəbul edib.
Başçının müavini bildirib ki, məsələnin həlli istiqamətində işləri daha da sürətləndirmək üçün tədbirlər görüləcək.
“Sahibkarlar tərəfindən layihə sənədləri hazırlanmış və aidiyyəti üzrə təşkilata təqdim olunmuşdur. Həmin təşkilat tərəfindən müsbət rəy veriləcəyi təqdirdə qısa müddət ərzində həmin ərazidə tikinti işləri davam etdiriləcək və icarədarlar çox qısa müddətdə həmin iş yerlərinə geri dönəcəklər”, - Nərimanov RİH başçısının muavini Yusif Sadıqov bildirib.
