Suraxanı Rayon Polis İdarəsinin Narkotiklərlə Mübarizə Bölməsinin əməkdaşları Hövsan, Yeni Günəşli, Qaraçuxur, Bülbülə, Əmircan qəsəbələri və digər ərazilərdə əməliyyat aparıblar. Bu haqda bu gün, 15 iyun tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Əməliyyat zamanı narkotiklərin satışı ilə məşğul olan 9 nəfər - Vüsal Məhərrəmov, Əfqan Qədimov, Nazim Əsgərov, Polad Cəfərov, Elşən İsrafilov, Şahin Mustafayev, Zahid Məmmədov, Sergey Pimenov və Elman Nəzərov saxlanılıblar. Onlarda ümumilikdə 8 kiloqram heroin, tiryək, marixuana və psixotrop maddə metamfetamin aşkar edilib.
Saxlanılan şəxslər bildiriblər ki, narkotik vasitələri İran vətəndaşlarından satış məqsədilə onlayn yolla əldə ediblər.
Ümumilikdə bir ay ərzində narkotiklərin dövriyyəsini təşkil edən 45 nəfər saxlanılıb. Yoxlamalar zamanı qanunsuz olaraq silah saxlayan daha 4 nəfər saxlanılıb. Onlarda 1 ədəd “Kalaşnikov” markalı avtomat, 2 ədəd tapança, 1 ədəd “TOZ” markalı müvafiq sənədləri olmayan tüfəng və 12 ədəd patron aşkar edilib.
