Müasir Müsavat Partiyasının sədri Hafiz Hacıyevin son açıqlaması siyasətçilərin pensiya məsələsini gündəm edib. Pensiya almadığını iddia edən və buna görə müvafiq dövlət qurumlarını günahlandıran 68 yaşlı partiya sədrinə rəsmi cavab çox gecikməyib.
Əmək və Əhalinin Sosial Müdafiəsi Nazirliyinin tabeliyində fəaliyyət göstərən Dövlət Sosial Müdafiə Fondundan Hafiz Hacıyevin 337,77 manat pensiya aldığı bildirilib.
Bəs Hafiz Hacıyevdən başqa hansı partiya sədrləri pensiya alırlar?
Modern.az xəbər verir ki, partiya sədrlərinin bir çoxu pensiya yaşındadırlar.
Müsavat Partiyasının başqanı İsa Qəmbər 2022-ci il fevralın 24-də 65 yaşına çatıb. 1957-ci il təvəllüdlü İsa Qəmbər 1990-1995-ci illərdə keçmiş Ali Sovetin deputatı, 1992-1993-cü illərdə sədri olub, 1992-ci il mayın 18-dən iyunun 17-dək prezident səlahiyyətlərini icra edib.
Amma İsa Qəmbər heç minimum pensiya da almır. Ona yaşa görə sosİal müavinət təyin edilib ki, bu da hazırda 220 manat təşkil edir. Dövlət Sosial Müdafiə Fondu bəyan edib ki, qanun pensiya hüququ üçün ya 25 il sığorta stajı, ya da minimum pensiya kapitalı (2025-ci ildən 46080 manat olub) şərti qoyur, İsa Qəmbərin sənədləri bu şərtlərə uyğun gəlməyib. Ona görə də ona 220 manat sosial müavinət təyin edilib. İsa Qəmbər isə bu əsaslandırmanı ədalətsizlik sayaraq, ona ayrılan sosial müavinəti almaqdan imtina edib.
Azərbaycan Demokrat Partiyasının (ADP) sədri Sərdar Cəlaloğlu 71 yaşındadır. 1954-cü il təvəllüdlü ADP sədri minimum pensiya alır. S.Cəlaloğlu da ona təyin edilən pensiyanın məbləğindən narazıdır.
Klassik Xalq Cəbhəsi Partiyasının (KXCP) sədri Mirmahud Mirəlioğlu pensiya yaşlı siyasətçilərdəndir. 1956-cı il təvəllüdlü Mirmahmud ağanın 69 yaşı var. O, bir müddət öncə adi pensiya aldığını qeyd etmişdi. M.Mirəlioğlunun sözlərinə görə, cəmiyyətin pensiya yaşına çatmış bütün üzvlərinin pensiyaları onları təmin etməlidir.
