Meyxanaçı Rəşad Dağlının (Əmirov) tanışı İsgəndər Mehdiyevi öldürməsinin səbəbi yayılıb. Bu haqda bu gün, 11 noyabr tarixində Report məlumat verir.
Məhkəməyə təqdim olunan məlumatda bildirilir ki, dəfələrlə məhkum olunmuş İ.Mehdiyev müxtəlif vaxtlarda Rəşad Dağlıya telefonla zəng edərək, guya onun cinsi azlıq nümayəndəsi olması barədə şayiələr yayıb. Bundan başqa, Mehdiyev bu məsələyə birdəfəlik son qoymaq üçün meyxanaçıdan müəyyən məbləğdə pul tələb edib, əks halda onun barəsində böhtan xarakterli məlumatlar yayacağı ilə hədələyərək Rəşad Dağlını şantaj edib.
Noyabrın 9-da səhər saat 05:00 radələrində Rəşad Dağlı “məsələyə aydınlıq gətirmək üçün” onunla görüşmək qərarına gəlib. O, Mehdiyevin yaşadığı ünvana “Niva” markalı avtomobili ilə yaxınlaşaraq onu bayıra çağırıb. O, İsgəndəri avtomobilin qabaq oturacağına əyləşdirərək Bakı-Qazax yolunun Qaradağ rayonu ərazisindən keçən hissəsinə aparıb. Söhbət zamanı İ.Mehdiyev meyxanaçının ünvanına nalayiq ifadələr işlədib. Bu zaman Rəşad Dağlı onu döş qəfəsindən bıçaqlayıb.
İstintaq orqanının təqdimatında meyxanaçının İ.Mehdiyevi ümumilikdə 14 bıçaq xəsarəti yetirərək öldürdüyü göstərilib.
Tanışının öldüyünü görən Dağlı onun meyitini avtomobildən ataraq hadisə yerindən yayınıb. Bundan sonra o, saat 05:30 radələrində Yasamal Polis İdarəsinin növbətçi hissəsinə gələrək qətl törətdiyini və könüllü təslim olmaq istədiyini bildirib.
Qaradağ rayon məhkəməsində Rəşad Dağlı törətdiyi cinayəti etiraf edib.
Meyxanaçı bildirib ki, hadisə zamanı yanında kəsici alətlər olmayıb, onun şərəf və ləyaqətini alçaldandan sonra zərərçəkmişin əlindən bıçağı qoparıb və mübahisə zamanı İ.Mehdiyevin ürək nahiyəsinə xəsarət yetirib.
Faktla bağlı Qaradağ rayon prokurorluğunda Cinayət Məcəlləsinin “Qəsdən adam öldürmə” maddəsi ilə cinayət işi başlanıb. Qaradağ Rayon Məhkəməsinin qərarı ilə Rəşad Dağlı 4 ay müddətinə həbs edilib.
