Səbail rayonunda yeni park salınır. Bu haqda 7 aprel tarixində Realtv məlumat verib.
Sakinlərin asudə vaxtlarını səmərəli keçirmələri üçün Səbail rayonu, Həsən Seyidbəyli və Mehdi Hüseyn küçələrinin kəsişdiyi ərazidə salınan yeni parkda son tamamlanma işləri aparılır. Bununla da bura Bakı sakinləri, qonaqların, xüsusilə də turistlərin ən sevdiyi, əylənə biləcəyi istirahət məkanlarından birinə çevriləcək.
İki hektar ərazini əhatə edən parkın sahəsinin 70 faizi yaşıllıqlardan ibarətdir. Parkın landşaftı mürəkkəb və sərt yamaclıdır. Bu park şəhərsalmanın standartlarına və müasir tələblərə uyğun şəkildə qurulur. Bu parkda insanların asudə vaxtlarını səmərəli keçirmələri üçün bütün şərait yaradılıb. Aktiv istirahəti sevən sakinlər üçün əyləncə zonaları mövcud olacaq, müxtəlif idman qurğuları, uşaq meydançası, həmçinin söhbətgahlar quraşdırılacaq, oturacaqlar qoyulacaq, sanitar qovşaq yaradılacaq. Eləcə də, parkda bir ədəd fəvvarə kompleksinin inşası da aparılır.
Ərazidə, həmçinin çoxlu sayda həmişəyaşıl dekorativ ağacların, bitkilərin əkilməsi yeni salınan parkı gözəlləşdirmək ilə yanaşı havanın təmizlənməsinə də kömək edəcək.
