Şəhid Səbuhi Əhmədovun vərəsəsi kimi qardaşı Sənan Əhmədova 11.000 manat məbləğində birdəfəlik ödəmə verilib. Bu haqda 6 oktyabr tarixində Bakuplus.az Modern.az-a istinadən məlumat verir.
Vətəndaş aidiyyəti qurumdan vərəsə olmasını təsdiq edən sənədləri 4 oktyabrda təqdim etdikdən dərhal sonra, elə həmin gün Dövlət Sosial Müdafiə Fondundan Sənan Əhmədova birdəfəlik ödəmə təyin olunub:
"Vətəndaşın müvafiq bank hesabına ödəniş artıq həyata keçirilib. Bu barədə ona məlumat verilib. 5 oktyabr tarixindən o, banka yaxınlaşaraq kartını əldə edib, birdəfəlik ödənişini ala bilər", - qurumunun İctimaiyyətlə əlaqələr şöbəsinin müdiri Rəşad Mehdili bildirib.
2 yaşında valideynlərini itirən Səbuhi Əhmədov qardaşı Sənan Əhmədovla birlikdə SOS Uşaq Evində böyüyüb. 12-14 sentyabr 2022-ci ildə Ermənistan tərəfinin təxribatı nəticəsində şəhid olmuş 24 yaşlı hərbçi Səbuhi Əhmədov İkinci Fəxri xiyabanda dəfn olunub.
