Bir müddət əvvəl görüntüləri sosial şəbəkələrdə yayılan sürücü ilə mübahisə edən yol polisi əməkdaşlarına qarşı tədbir görülüb. Bu haqda bu gün, 12 sentyabr tarixində Bakuplus.az Bakı şəhər Dövlət Yol Polisi İdarəsinin baş inspektoru, polis mayoru Araz Əsgərliyə istinadən məlumat verir.
Aralarında yaranmış mübahisəyə görə inspektor Malik Qasımov və polis kapitanı Elnur İsgəndərov cəzalandırılıblar. Müvafiq sərəncamla Qasımov tutduğu vəzifədən azad edilərək məsuliyyətə cəlb edilib, İsgəndərova isə şiddətli töhmət verilib.
Qeyd edək ki, yayılan videoda özünü təqdim edən inspektor Malik Qasımov sürücünü çəkiliş apardığına görə ittiham edərək kameranı söndürməyi, maşından düşərək danışmağı tələb edib. Polis zabiti vətəndaşa qarşı: “Düş, söhbət edək, maykada maşın sürərlər?”, - kimi ifadələr istifadə edib.
