Paytaxtın Nəsimi rayonu, Salatın Əsgərov küçəsi 213 ünvanında 30-a yaxın ailənin yaşadığı ev uçmaq təhlükəsi ilə üz-üzə qalıb. Bu haqda Xəzər Xəbər reportaj təqdim edib.
Dördmərtəbəli binanın daşları köhnəlib, divarlarında iri çatlar əmələ gəlib, pilləkənlər uçmaq üzrədir.
Sakinlərin sözlərinə görə, bina 130 il əvvəl tikilib, tarix və mədəniyyət abidəsi kimi qeydiyyata alınıb. Ev sakinləri mövcud problemlərlə bağlı aidiyyəti qurumları məlumatlandırdıqlarını iddia edirlər.
Evin birinci mərtəbəsində yaşayan sakin Lətifə Rəsulovanın sözlərinə görə, binadakı su və kanalizasiya boruları da baxımsızlıqdan yararsız vəziyyətə düşüb.
Binanın tarixi tikili olması barədə Mədəni İrs Obyektlərinin Qorunması, İnkişafı və Bərpası üzrə Dövlət Xidmətinə müraciət edilib. Adıçəkilən qurumun mətbuat katibi Nuridə Allahyarova bildirib ki, bu bina həqiqətən də tarixi binadır və abidə kimi qeydiyyatdadır.
Onun sözlərinə görə, belə olan halda binanın sökülməsindən söhbət gedə bilməz. Bunun üçün bir neçə müvafiq dövlət qurumunun rəyi və qərarı olmalıdır. Əks halda, tarixi və tarixi abidələrin tikintisinə mane olan şəxslər məsuliyyətə cəlb oluna bilərlər.
