Qərbi Kaspi Universitetinin tələbələri təhsil ocağında tətbiq edilən bəzi qaydalardan narazılıqlarını bildirərək, bunları təhsilalanların hüquqlarının pozulması kimi dəyərləndirirlər.
Bakuplus.az-a daxil olan şikayətdə bildirilir ki, ölkə ərazisində heç bir ali məktəbdə rast gəlinməyən hal Qərbi Kaspi Universitetinin rəhbərliyi tərəfindən tələbələrə yaşadılır. Belə ki, bayram günlərinə təsadüf edən bütün dərslər istirahət günü olan şənbə günlərində əlavə olaraq dərs cədvəlinə salınır və bu dərslərdə iştirak mütləq vacibdir.
"Əks halda tələbəyə qaib yazılır və qaib limitini aşmaq, nəticə olaraq da imtahanlara buraxılmamaq təhlükəsi yaranır. Axı niyə belə olmalıdır? Məgər Qərbi Kaspi Universiteti Azərbaycan dövlətinin qanunlarına riayət etməməlidir? Bu hüququ axı universitet rəhbərliyinə kim verib? Nə üçün bayram günlərini burnumuzdan gətirməlidirlər? Hələ bir anons da veriblər ki, qarşıdan gələn bayram günlərində də eyni üsulu tətbiq edəcəklər", - şikayətçilər bildiriblər.
Tələbələri narazı salan digər bir məsələ isə hər dərsin əvvəlində pedaqoqlar tərəfindən mobil telefonların toplanmasıdır.
"Dünyanın aparıcı təhsil müəssisələrində tələbələrə elm və texnikanın ən son nailiyyətlərindən istifadə imkanları yaradılır, bizim universitetdə isə bizi, deyəsən, ötən əsrin ortalarına qaytarmaq niyyətindədirlər. Tələbədən mobil telefonlar nə üçün müsadirə edilməlidir? Nədən qorxurlar? Bəlkə təhsil prosesində, dərs zamanı yaşanan neqativ halların ictimailəşdirilməsindən ehtiyatlanırlar? Doğurdanmı anlamırlar ki, müasir dövrdə tələbə üçün mobil telefon təhsil prosesi üçün olduqca vacib vasitədir? Digər tərəfdən isə universitet rəhbərliyinin belə davranışı tələbələrin şəxsiyyətini alçaltmaq deyilmi?".
Qərbi Kaspi Universitetinin tələbələri təhsil ocağının rəhbərliyini sözügedən halları və narazılıqları nəzərə almağa, qaydalara riayət etməyə və qeyd olunanlardan irəli gələn müvafiq addımlar atmağa çağırırlar.
Məsələ ilə bağlı Qərbi Kaspi Universitetinə sorğu ünvanlamışıq.
