Suraxanıda sakinləri narahat edən ət məntəqəsi bağlanıb. Bu haqda 22 iyul tarixində Realtv məlumat verib.
Əmircan qəsəbəsində yaşayan vətəndaşlar sahibkar Natiq Məmişovla bağlı AQTA-ya və polisə şikayət ediblər. Reyd zamanı məlum olub ki, Məmişova məxsus heyvan mənşəli məhsulları emal edən müəssisə qanunsuz fəaliyyət göstərir. Sanitar-gigiyenik normalara riayət olunmayan müəssisədə iribuynuzlu və xırdabuynuzlu mal-qaranın gönü, daxili orqanları və digər nahiyələrinin müxtəlif məqsədlərlə satıldığı müəyyənləşib.
Müəssisənin soyuducu zonasına baxış zamanı da sanitar-gigiyena qaydalarına, qida təhlükəsizliyi sahəsində texniki-normativ hüquqi aktların tələblərinə əməl olunmadığı müəyyən edilib.
Sahibkar müəssisədə heyvan kəsimini həyata keçirmədiyini bildirsə də, aşkarlanan məhsullar və kəsim üçün nəzərdə tutulan qurğu bunun əksini göstərir. Antisanitar şərait və qanunauyğunsuzluq nəzərə alınaraq, müəssisənin fəaliyyəti dayandırılıb.
Sahibkar qanunvericiliyin tələblərinə uyğun olaraq müvafiq inzibati məsuliyyətə cəlb olunacaq.
[URIS id=53591]
