Paytaxtın Səbail rayonu, Nigar Rəfibəyli küçəsində yol hərəkətinin təşkilində müşahidə olunan uyğunsuzluq sürücülərin narazılığına səbəb olub.
Avtosfer.аz xəbər verir ki, iki istiqamətli yolun ortasında enli qoşa xətt çəkilib və nəticədə manevr üçün nəzərdə tutulan hissədə məhdudiyyət yaranıb.
Geriyə dönmə nişanının tələbinə uyğun manevr etmək istəyən sürücülər çətinliklə üzləşirlər. Əksər hallarda sürücülər təhlükəsiz manevr edə bilmək üçün avtomobili dəfələrlə irəli-geri hərəkət etdirməyə məcbur qalırlar ki, bu da həm vaxt itkisinə, həm də yol hərəkətində əlavə risklərə səbəb olur.
Məsələ ilə bağlı AYNA-nın mətbuat katibi Tural Orucov bildirib ki, qeyd edilən ərazidə işlər yol hərəkəti iştirakçılarının təhlükəsizliyi nəzərə alınmaqla, standartlara uyğun həyata keçirilib.
Onun sözlərinə görə, layihəyə əsasən zolağın eni 3,20 metr saxlanılıb. Bu isə sürücülərin piyadaların intensiv hərəkət etdiyi küçəyə daxil olarkən maksimal dərəcədə diqqətli olmaları və aşağı sürət rejimindən istifadə etmələri məqsədilə edilib.
Tural Orucov qeyd edib ki, geriyə dönmə yerində zolağın eni 4 metrə qədər artırılıb: "3,2 metrlik zolaq eni istənilən minik avtomobilinin və 3,5 tona qədər yük avtomobilinin rahat keçidi üçün kifayətdir. Dönmə radiusları normativ tələblərə uyğundur".
