Melburn Universitetində Bədii və Sənədli Filmlər üzrə Prodüserlik magistr proqramında təhsil alan azərbaycanlı tələbə Afaq Yusiflinin təhsil haqqı ilə bağlı problem hələ həll olunmayıb.
Bakuplus.az əməkdaşı tələbə Afaq Yusifli ilə əlaqə saxlayaraq məsələnin son durumunu öyrənməyə çalışıb.
A.Yusifli bildirib ki, məsələnin həlli üçün təşəbbüslər var. Lakin bunun üçün universitetin həmin təşəbbüsləri qəbul etməsi vacibdir.
"Bu baxımdan məsələ həll edilməsi üçün diqqət mərkəzinə alınıb, lakin hələ də həll edilməyib", – deyə tələbə qeyd edib.
Qeyd edək ki, daha əvvəl sosial şəbəkələrdə Afaq Yusifliyə yardım edildiyi və problemin həll olunduğu barədə məlumat yayılmışdı. Tələbə isə yayılan məlumatların onunla rəsmi şəkildə paylaşılmadığını bildirmişdi.
Onu da xatırladaq ki, A.Yusifli təhsil haqqının bir hissəsinin ödənilməməsi səbəbindən Melburn Universitetindən xəbərdarlıq alıb. Onun sözlərinə görə, təhsil haqqı üçün nəzərdə tutulan 25 500 manat 2025-ci ilin dekabrında Azərbaycan Kinematoqrafçılar İttifaqına ayrılıb, lakin vəsait universitetə köçürülməyib.
