Bu gün – 10 noyabr 2020-ci ildə imzalanmış Üçtərəfli Bəyanatdan beş il ötür. Həmin sənədlə Ermənistan Azərbaycan ordusunun gücü qarşısında tab gətirə bilməyərək kapitulyasiya aktına imza atdı.
10 noyabr Azərbaycan tarixində qürur və zəfər günü kimi yadda qalıb. 44 gün davam edən Vətən müharibəsində əldə olunan tarixi qələbə ölkə boyunca böyük sevinc və fərəh hissi ilə qarşılanmışdı. Ölkəmizdə qələbə sevinci yaşanarkən, Ermənistanda tam fərqli mənzərə hökm sürürdü – küçələrə çıxan ermənilər parlament binasına hücum edir, Baş nazirlərini axtarırdılar.
Üçtərəfli Bəyanat Azərbaycan Prezidenti, Müzəffər Ali Baş Komandan İlham Əliyev və Rusiya Prezidenti Vladimir Putin tərəfindən canlı yayımda imzalanmışdı. Ermənistanın baş naziri isə sənədə harada və hansı şəraitdə imza atdığı bu günə qədər də məlum deyil.
Kapitulyasiya sənədi Ermənistanın hərbi və siyasi məğlubiyyətini rəsmiləşdirdi. Müharibə dövründə pafoslu bəyanatlar səsləndirən erməni rəsmiləri həmin gecə artıq çıxış yolunun qalmadığını anlayaraq acizliklərini etiraf etdilər.
