Bu gün Azərbaycan və Rusiyanın Xalq artisti Nodar Şaşıqoğlunun doğum günüdür. Onun anadan olmasından 99 il ötür.
Nodar İzzətoviç Şaşıqoğlu 1927-ci il martın 13-də Batumidə doğulub. Babası Acarıstanda tanınmış zadəganlardan, atası çar zabiti olub. Əmisi, aktyor Ülvi Rəcəb isə 1937-ci ildə repressiyaya məruz qalıb.
Əsli acarıstanlı olsa da, Tbilisidə yaşayıb. Orada orta məktəbi, daha sonra Moskvada Şukin adına Teatr İnstitutunu bitirib. Cəmi bir il Vaxtanqov adına teatrda işləyib. 5–6 il Taqanka Teatrında çalışıb.
İlk rolu "Mosfilm"də Albaniya dövlətçiliyinin əsasını qoyan Georgi İsgəndərbəyov haqqında çəkilən filmdə olub. Orada türk imperiyasının əsasını qoyan Mehmet bəy Fatehi canlandırıb.
Sonra Sergey Paracanovun ilk rejissor işi olan "Andrieş" filmində baş rolu oynayıb. Bu filmdən sonra "Odessa" kinostudiyasında çalışıb.
Nodar Şaşıqoğlu teatr səhnələrində Don Quan (A.S. Puşkin "Kiçik tragediyalar"), Sirano (E. Rostan "Sirano de Bercerak"), Kreont (Q. Qauptman "Antiqo-solntsa"), kinoda Zakir ("Telefonçu qız"), Rakov ("Beş künc"), Məcnun ("Leyli və Məcnun"), Mixaylo ("Uzaq sahillərdə") kimi obrazları yaradıb.
Qeyd edək ki, quruluşçu rejissor Tofiq Tağızadə tərəfindən 1958-ci ildə ekranlaşdırılan "Uzaq sahillərdə" filmi Azərbaycan xalqının şanlı oğlu, Sovet İttifaqı Qəhrəmanı Mehdi Hüseynzadənin İkinci Dünya Müharibəsi illərində İtaliya və Yuqoslaviyada faşist işğalçılarına qarşı apardığı mübarizədən bəhs edir. Film prokata çıxdığı zaman 27,8 milyon tamaşaçı tərəfindən izlənib. 1959-cu ildə Kiyevdə Ümumittifaq kinofestivalında nümayiş etdirilib. Ekran əsərinin musiqisinə görə dahi bəstəkar Qara Qarayevə II mükafat verilib.
İmran Qasımov və Həsən Seyidbəylinin eyniadlı povesti əsasında ekranlaşdırılan filmin baş qəhrəmanı Mehdi Hüseynzadəni aktyor Nodar Şaşıqoğlu canlandırıb və elə bu filmlə də məşhurlaşıb.
Nodar Şaşıqoğlunun kino və teatr sənətinin inkişafı sahəsindəki xidmətləri Azərbaycanda yüksək qiymətləndirilib. O, 1982-ci ildə Azərbaycanın Xalq artisti fəxri adına layiq görülüb, 2007-ci ildə isə müstəqil Azərbaycanın ali mükafatı olan "Şöhrət" ordeni ilə təltif edilib.
Aktyor 2013-cü il aprelin 12-də Bakıda vəfat edib.
