Yasamal rayonu, MİDA yaşayış kompleksində yerləşən binanın 5-ci mərtəbəsindən intihar məqsədilə iki övladı ilə özünü atan qadının məhkəməsi başa çatıb. Bu haqda bu gün, 16 oktyabr tarixində Bakuplus.az Qafqazinfo-ya istinadən məlumat verir.
Hökmə əsasən, Aytən Abbasova hadisəni anlaqsız vəziyyətdə törətdiyindən cinayət məsuliyyətindən azad edilib. Onun barəsində ümumi tipli psixiatriya stasionarında tibbi xarakterli məcburi müalicə təyin edilib.
Hadisə ötən ilin iyul ayında baş verib. Aytən Abbasova övladları – 4 yaşlı Sofiya və 2 yaşlı Sara ilə birgə 5-ci mərtəbədən özünü atıb. Nəticədə Sara dünyasını dəyişib, ana və Sofiya isə ağır xəsarətlərlə xəstəxanaya çatdırılıblar.
Verilən məlumata görə, qayınanası Aytən Abbasova ilə mütəmadi olaraq mübahisə edib.
Hadisə baş verəndən bir gün əvvəl gəlinlə qayınana arasında yenidən mübahisə başlayıb. Səs-küyə gələn evin mühafizə işçiləri mənzilin qapısını dəfələrlə döysələr də, heç kim açmayıb.
Aytən Abbasova əvvəllər də intihara cəhd edib. Lakin həmin zaman qadına qonşular mane olublar.
Hadisə ilə bağlı Yasamal Rayon Prokurorluğunda “Özünü öldürmə həddinə çatdırma” maddəsi ilə cinayət işi açılıb. Lakin istintaq zamanı cinayət işinin maddəsi dəyişilib.
