Beynində şiş aşkarlanan Əməkdar artist Tünzalə Əliyeva müalicəsi üçün evini 70 min manata satışa çıxarıb. Bu haqda bu gün, 8 noyabr tarixində Bakuplus.az Milli.az-a istinadən məlumat verir.
Açıqlama verən aktrisa 15 noyabrdan şüa terapiyasına başlayacağını deyib. Yalnız terapiyanın cavabından sonra əməliyyata ehtiyac olub-olmadığı bilinəcək. Əliyeva 5 ildir ki, Milli Onkologiya Mərkəzində müalicə alır.
“Bir neçə nəfər mənə Almaniyadan, Türkiyədən yazdı ki, ağıllı iynələr var. Düzü, mən hələ həkimlə də məsləhətləşməmişəm. Çünki hazırda bayramla əlaqədar iş yoxdur. İş başlayanda həkimimlə də məsləhətləşəcəm, inşallah. Amma özüm maraqlandım, bahalı dərmanlardır”, - deyə Toppuş bacı bildirib.
O, xaricdə müalicə üçün pul toplamaq məqsədilə evi satmağı planlaşdırdığını deyib. Ev almaq istəyənlər ona 60-70 min manat təklif ediblər.
Sənətçi qeyd edib ki, heç kimdən maddi yardım istəmir. O bildirib ki, Zaur Baxşəliyevin sayəsində yaşadığı evin pulu ödənilib.
