Yasamal rayonunda yerləşən avtoservisdə nöqsanlar aşkarlanıb. Bu haqda bu gün, 13 iyun tarixində Bakuplus.az Fövqəladə Hallar Nazirliyinə istinadən xəbər verir.
“FS Avto” MMC-yə məxsus “Ayaz” avtoservisində yoxlama zamanı yanğın təhlükəsizliyi sahəsində çoxsaylı nöqsanların mövcud olduğu məlum olub:
- Avtoservisdə propan tipli qaz balonlarından istifadə edilir;
- Elektrik təsərrüfatı “Elektrik Qurğularının Quraşdırılması Qaydası”nın tələblərinə uyğun quraşdırılmayıb və elektrik xətləri yanar materialların üzəri ilə çəkilib;
- Avtoservisin fəaliyyəti Dövlət Yanğın Nəzarəti Xidməti ilə razılaşdırılmayıb;
- Avtoservisin daxilində layihədənkənar taxta konstruksiyadan ibarət tikililər inşa edilib;
- Təxliyə planı işlənib hazırlanmayıb;
- Avtoservisin ərazisində yanğın su hovuzu mövcud deyil;
- Obyekt daxili yanğın su kranları və avtomatik yanğınxəbərverici siqnalizasiya qurğusu ilə təchiz edilməyib;
- Avtoservisin daxili yanar-sürtkü materiallardan təmizlənməyib.
Qeyd olunanları nəzərə alaraq, Bakı şəhəri, Yasamal rayonunda yerləşən “FS Avto” MMC-yə məxsus “Ayaz” avtoservisinin fəaliyyətinin dayandırılması barədə qərar qəbul olunub.
