Xətai rayonunda yerləşən Zığ gölü və ətrafı abadlaşdırılır. Əhalinin istirahəti üçün 300 hektara yaxın ərazidə infrastruktur qurulacaq. Bu haqda bu gün, 1 mart tarixində Bakuplus.az Xəzər Xəbər-ə istinadən məlumat verir.
Bir neçə ay əvvəl Zığ gölü ərazisində antisanitar bir vəziyyət hökm sürürdü. Hazırda təxliyə kanalı açılıb və gölün Xəzər dənizi ilə əlaqəsi bərpa edilib, ərazidəki antisanitar vəziyyət isə tam şəkildə təmizlənib.
Gölün ekoloji vəziyyətinin yaxşılaşdırılması, mühafizəsi və ərazinin abadlaşdırılması üçün ölkə başçısının sərəncamı ilə işlər Ekologiya və Təbii Sərvətlər Nazirliyinə həvalə edilib. Gölün təmizlənməsi üçün ərazidə xaricdən alınan xüsusi qurğular quraşdırılır.
Təqribən 110 hektara yaxın su hövzəsinin suyunun texniki su səviyyəsinə çatdırılması, orada olan ağır metalların xüsusi reagent və avadanlıq vasitəsilə təmizlənməsi, bundan əlavə, Zığ gölünün ətrafında uzun illər toplanıb qalmış tullantıların təmizlənməsi, torpağın əvvəlki vəziyyətə qaytarılması, əkinə yararlı vəziyyətə salınması nəzərdə tutulub.
Göl və mühafizə zonası tam təmizləndikdən sonra əhalinin asudə vaxtını səmərəli keçirməsi üçün burada lazımi şərait yaradılacaq.
Dövlət Ekoloji Ekspertiza Agentliyinin idarə heyətinin sədri Mirsalam Qənbərov deyir ki, Abşeron yarımadasında 9 əsas göl var. Böyükşor gölü kimi, Zığ gölündə də məqsəd qurudulma yox, sağlamlaşdırılma olmalıdır: “Hədəf gölləri o çırkab mənbəyindən xilas etməkdir. Düşünürük ki, bizim həyata keçirdiyimiz reabilitasiya tədbirləri nəticəsində gölün bərpası ətrafında yaxşı ekoloji infrastruktura layiq mənzərə yaradılacaq”.
Gölün təmizlənməsi məqsədilə ərazidə inşa edilən qurğunun mart-aprel aylarında tam işə düşməsi hədəflənir.
[caption id="attachment_92532" align="alignnone" width="640"]
Foto Xəzər Xəbərin rəsmi Youtube kanalı[/caption]
