Paytaxtın Suraxanı rayonu Zığ qəsəbəsində torpaq sürüşməsi daha bir neçə binanın sakinlərinin şikayətinə səbəb olub. Bu haqda bu gün, 17 noyabr tarixində APA məlumat yayıb.
20 ildir qəzalı vəziyyətdə olan 39 saylı binada iri çatlar əmələ gəlib və davam edir. Həmçinin, 41 və 43 saylı binalar və 57 fərdi yaşayış evi də eyni vəziyyətdədirlər.
“Əvvəllər iki binanın arasındakı məsafə yarım metr idi, indi isə bir-birilərinə yapışıb” - deyə sakinlər bildirirlər.
Qeyd olunan binaya gedən əsas yol İcra Hakimiyyəti tərəfindən atvomobillər üçün təhlükəli olduğundan bağlanıb. Yolun sürüşməməsi üçün tikilən istinad divarı da əyilib.
Məsələyə rayon İcra Hakimiyyətinin şöbə müdiri Mehman Hüseynov aydınlıq gətirib: “Vəziyyət qorxuludur. Məsələ ilə bağlı Fövqəladə Hallar Nazirliyi əraziyə baxış keçirib və qəzalı olması ilə bağlı qərar qəbul edilib. Biz də məsələnin qorxulu olması ilə bağlı müraciət etmişik və düşünürəm ki, yaxın günlərdə qərar qəbul ediləcək”.
Daha öncə 15 noyabr tarixində həmin qəsəbənin Xanlar və Hətəm Allahverdiyev küçələrinin sakinləri torpaq sürüşməsi ilə bağlı şikayət edirdilər.
