Buzovna qəsəbəsinin Xurşidbanu Natavan, Ağa Nemətulla və Nəcəf bəy Vəzirov küçələrində bir müddət əvvəl asfalt çəkilərək yollar yaxşı vəziyyətə salınıb. Lakin təxminən 5-6 ay əvvəl ərazidə uşaq bağçası tikilib və həmin bağçaya su xətti çəkmək üçün "Azərsu" əməkdaşları yolları qazıblar.
Bu barədə Bakuplus.az-a qəsəbə sakinləri məlumat verib.
Onların sözlərinə görə, qazıntı işlərindən sonra yollar bərpa edilməyib. Nəticədə yağışlı havalarda küçələrdə iri gölməçələr yaranır, piyadaların və avtomobillərin hərəkəti çətinləşir.
Məsələ ilə bağlı bir neçə dəfə müraciət olunsa da, indiyədək yollar düzəldilməyib.
Bakuplus.az əməkdaşı problemlə bağlı İri Şəhərlərin Birləşmiş Su Təchizatı Xidmətinə sorğu ünvanlayıb. Qurumdan sorğumuza cavab olaraq bildirilib ki, qeyd olunan ünvanda asfalt qatı yaxın günlərdə bərpa ediləcək.
