Ali Məhkəmədə hədə-qorxu ilə tələb etmədə təqsirləndirilən Tahir Məmmədlinin (ad şərtidir) kassasiya şikayəti üzrə məhkəmə iclası keçirilib və qərar elan olunub.
Pravda.az xəbər verir ki, ittihama görə, Tahir Məmmədli tanış olduğu zərərçəkmiş qızın rüsvayedici fotolarını internet üzərindən yayıb ictimailəşdirəcəyi və ailə üzvlərinə göstərəcəyi ilə hədələyərək pul tələb edib. O, özünü hüquq-mühafizə orqanı əməkdaşı kimi təqdim edərək qızla səmimi fotolar çəkdirib və sonradan bundan istifadə edib. 2025-ci ilin fevralında fotoları yayacağı ilə hədələyərək 1000 manat tələb edib və zərərçəkmiş əvvəlcə onun bank kartına 300 manat köçürüb. Daha sonra aprel ayında yenidən hədə-qorxu gələrək əlavə 500 manat alıb. Nəticədə zərərçəkmiş şəxsə ümumilikdə 800 manat maddi ziyan vurulduğu müəyyən edilib. Bildirilib ki, Tahir Məmmədli həbs edilən zaman Bakıdakı universitetlərin birində birinci kurs tələbəsi olub.
Qərara əsasən, kassasiya şikayəti qismən təmin edilib, Bakı Apellyasiya Məhkəməsinin qərarı dəyişdirilib. Ona Cinayət Məcəlləsinin 182.2.2-ci maddəsi ilə verilmiş 5 il azadlıqdan məhrumetmə cəzası 2 il sınaq müddəti ilə şərti hesab olunub və o, cəzaçəkmə müəssisəsindən dərhal azad edilib.
