Bakının Yasamal rayonunda 48 yaşlı Zaur (ad şərtidir) adlı kişi qeyri-rəsmi həyat yoldaşını döyüb.
Demokrat.az xəbər verir ki, hadisə 25 yanvar 2025-ci ildə baş verib. Axşam saatlarında Zaur evdə Cəmilə (ad şərtidir) ilə mübahisə edib və əsəbiləşərək onu əlləri və ayaqları ilə vurub.
Təqsirləndirilən şəxs məhkəmədə bildirib ki, Cəmilə ilə 17 ildir birgə yaşayır, amma rəsmi nikahları yoxdur.
Zaurun sözlərinə görə, evə ərzaq almadığı üçün arvadı onunla mübahisə edib. O bildirib ki, bu zaman əlindəki ütünü ona tərəf atıb və əsəbiləşərək qadına şillə vurub. Zaur bundan sonra evi tərk edib və həmin binada başqa mənzili kirayə tutub.
Təqsirləndirən şəxs ifadəsində əlavə edib ki, daha sonra arvadı ilə barışıb, lakin sonradan yenidən mübahisə düşüb.
Zaur deyib ki, arvadı pul məsələsinə görə deyinməyə davam edib və onun qolundan tutaraq "çıx evdən" deyib. Bu zaman o, affekt vəziyyətində olduğunu iddia edərək yoldaşına şillə vurub.
Yasamal Rayon Məhkəməsinin hökmü ilə Zaurun barəsində Cinayət Məcəlləsinin 128-ci maddəsi üzrə hökm oxunub — o, 1 il müddətinə islah işlərinə məhkum edilib və aylıq qazancının 15 faizi dövlət nəfinə tutulacaq.
