10 may 1817-ci ildə Rus imperatoru I Aleksandr 700 Şvab ailəsinin (Şvabiya-müasir Almaniyanın cənub-qərbində, yuxarı Ren və Dunayda tarixi əyalət) Cənubi Qafqaza köçürülməsi haqqında Sərəncam imzaladı. Artıq 1819-cu ildə Gəncəçay çayının sağ sahilində, ilk Alman məskəni - Yelenendorf (Göygöl) qəsəbəsi meydana çıxmışdı. Almanlar Bakının özündə qəsəbələr salmasalar da, şəhərin mərkəzində məskunlaşırdılar və burada kənd təsərrüfatı mallarından ibarət mağazalar açırdılar. Azərbaycanda şərabçılıq təsərrüfatının qurucusu olan Forerlər ailəsi onlardan biri idi. [https://1news.az/az/news/20210709040538894-Neft-bumu-ve-almanlar-Azerbaycanda-narinci-qizil-nece-meydana-geldi-FOTO]
Forerlər Şərab ticarətinə 1860-cı ildə başlamışdılar. Onların təsərrüfatı spirt, konyak və pivə sənayesindən ibarət idi. Şirkət qonşu əyalətlərdən, həmçinin Bakıdan da üzüm və şərab əldə edirdi. Forer pivə zavodu öz gücünə görə Zığdakı Bakı pivə zavodundan sonra Azərbaycanda ikinci yeri tuturdu. [Ахундова Туран. Немцы-колонисты Азербайджана: XIX-нач. XX в. Баку-1999]
XX əsrin əvvəllərində Forer şirkətinin Bakıda bir neçə mağazaları var idi. Onlardan biri Kolyubakinskaya (indiki Nigar Rəfibəyli) və Mariinskaya (indiki Rəsul Rza) küçələrinin kəsişməsində yerləşirdi. Digər bir mağaza Malaya Morskaya və Telefonnaya küçələrinin (indiki 28 May) kəsişməsində idi. Üçüncü mağaza Nijni Priyutskaya (indiki Süleyman Rəhimov) küçəsində, Forerlərin şəxsi evlərində yerləşirdi. Əsas anbar 213 nömrəli Kamenistaya (indiki Bəşir Səfəroğlu) küçəsində idi. [Форер Христофор и его сыновья Готлиб, Фридрих, Генрих и Христофор – предприниматели-виноделы — OurBaku]
Forerlərin evlərinin yaxınlığında Forer bağı salınmışdı. Burada bayramlar keçirilirdi, konsertlər verilirdi. Bağda boulinq meydançası və “Belvyu” adlı pivə restoranı açılmışdı. Bir müddət sonra bağın yerləşdiyi təpə “Forer dağı” kimi məşhurlaşmışdır. [Гумбатова Тамара. Баку и немцы. Баку-2008]
Sovet dövründə Forerlərin mülkləri milliləşdirildi. Forerlərin bir qismi güllələndi, digərləri isə Sibirə sürgün edildi.
