Bu gün dahi bəstəkar Üzeyir Hacıbəyovun doğum günüdür. Ümummilli lider Heydər Əliyevin müvafiq fərmanına əsasən, Hacıbəyovun doğum günü - 18 sentyabr ölkədə Milli Musiqi Günü kimi qeyd olunur.
Bəstəkarın yaradıcılığının böyük hissəsi Bakı şəhəri ilə bağlıdır.
Hacıbəyov 1905-ci ilin oktyabr ayında buraya köçür. O, əvvəlcə Bibi-Heybət, daha sonra Səadət şəhər məktəbində dərs deməyə başlayır. Pedaqoji fəaliyyəti ilə yanaşı, elmlə də məşğul olur - “Arifmetika məsələləri”, “Rus-türk və türk-rus lüğəti” dərsliklərini tərtib edir.
Hacıbəyov, həmçinin görkəmli jurnalist kimi tanınır. O, “Həyat”, “İrşad”, “Tərəqqi”, “İqbal”, “Yeni İqbal”, “İttihad” və başqa qəzetlərdə tərcüməçi kimi işləyir və məqalələri ilə çıxış edir. Hacıbəyov tənqidi məqalələr, hekayələr və felyetonlarını “Filankəs”, “Bisavad” kimi təxəllüslər altında dərc etdirir. O, rus yazıçısı Nikolay Qoqolun “Şinel” hekayəsini də Azərbaycan dilinə tərcümə edib.
[Məmmədli Q. Üzeyir Hacıbəyov. Bakı-1985]
Bəstəkarın iştirakı ilə 12 yanvar 1908-ci ildə Bakıda, Hacı Zeynalabdin Tağıyevin teatrında (indiki Musiqili Komediya Teatrının binasında) onun yazdığı “Leyli və Məcnun” operası səhnəyə qoyulub. Bu hadisə müsəlman Şərqində opera sənətinin əsasını qoyub.
AXC dövründə Hacıbəyov ölkənin ictimai - siyasi həyatında yaxından iştirak etmişdir. Həmin dövrdə Hacıbəyovun yaratdığı “Milli marş”, “Çırpınırdın Qara dəniz” bu gün bütün türk dünyasının himninə çevrilmişdir. “Azərbaycan marşı” isə 1992-ci ildə Azərbaycan Respublikasının Dövlət Himni kimi qəbul olunmuşdur. [http://ders.musigi-dunya.az/biography.html]
1921-ci ildə Hacıbəyovun təşəbbüsü ilə Bakıda Azərbaycan Dövlət Konservatoriyasının, 1922-ci ildə isə azərbaycanlı tələbələr üçün ilk musiqi məktəbinin - Azərbaycan Dövlət Türk Musiqi Texnikumunun əsası qoyulub.
