“Brodyaqa”, Əhməd əmi, Amanoğlu - təsəvvür edin ki, sevdiyiniz qız üçün elçiliyə bu adla tanınan insanları göndərmisiniz. Məsələnin necə sonluqla bitəcəyini düşünmək elə də çətin deyil.
Bu dəfə sizi “Bəyin oğurlanması” filmi haqqında məlumatlandıracağıq. Ssenari müəllifi Mövlud Süleymanlı, rejissorları Ceyhun Mirzəyev və Vaqif Mustafayev olan ekran əsəri 1985-ci ildə çəkilib.
Çəkiliş üçün Şamaxının Məlhəm kəndində bir qoboyçunun evini icarəyə götürüblər, amma toy səhnəsi həmin evlə üzbəüz başqa bir evin həyəti geniş olduğundan orada çəkilib. Çəkilişlər 3-4 ay – yay və payız aylarında aparılıb.
Müəllif bu ssenarini müğənni Sərxan Sərxan üçün yazıbmış. Yəni baş rolda, həm də bəy rolunda Sərxan özü oynamalı imiş. Həm də obraz kifayət qədər böyük olub, Sərxan Sərxan öz mahnılarını da ifa edəcəkmiş. Bir sözlə, film onun üzərində qurulmalı idi. Filmin çəkilişi isə rejissor Tofiq İsmayılova həvalə edilib. Hətta aktyorlar seçilib, bəzi çəkilişlər belə olub. Lakin sonradan filmin rejissorları da, aktyor da dəyişilib.
Elçilikdə bəhs edilən “Əjdaha” o vaxtlar qəzetlərdə haqqında yazılan Ness gölü bədheybətidir. Burada atalar sözlərinin deyilməsi ssenaridə olmayıb.
Çəkilişlər zamanı Arif Quliyev də Məlhəmdə imiş. Bunu öyrənən rejissorlar onun üçün rol fikirləşiblər. Ələsgər Ələsgərovun stuldan yıxılması da təbiidir. Yaradıcı qrup əvvəlcədən stulun ayağını kəsib ki, Ələsgər yıxılsın.
Muxtar Maniyevin Səyavuş Aslana xəbərsiz şillə vurması isə aktyorlar arasında mübahisəyə səbəb olur.
Belə ki, rejissorlar Muxtar Maniyevə tapşırıq verirlər ki, Səyavuşun xəbəri olmadan ona şillə vur, təbii alınsın. Alınmağına təbii alınır, amma Muxtar Maniyevi də Səyavuş Aslanın əlindən güclə alırlar.
Ekran əsərinin yaradılması prosesində mövcud problemlərdən biri isə rayon katibinin maneələri olub. Camaatın üzüm yığınına deyil, film çəkilişinə getməsi rayon rəhbərinin ciddi etirazlarına səbəb olub. Hətta bir dəfə “Partkom”un həyətə girərək camaatı oradan qovması Arif Quliyevin onu vurması ilə nəticələnib.
Film bəziləri üçün xoşbəxt, bəziləri üçün isə nakam qalan sevgi ilə bitir…
[URIS id=84587]
