Mehriban Arif qızı Əliyeva 26 avqust 1964-cü ildə Bakı şəhərində anadan olub. O, Azərbaycanın görkəmli alimi, fizika-riyaziyyat elmləri doktoru Arif Paşayevin qızıdır.
Mehriban Əliyeva 1981-ci ildə Bakı şəhər 23 №-li orta məktəbi bitirərək Nəriman Nərimanov adına Azərbaycan Dövlət Tibb İnstitutunun müalicə-profilaktika fakültəsinə daxil olub. Daha sonra təhsilini İ.M.Seçenov adına Birinci Moskva Dövlət Tibb İnstitutunda davam etdirib.
Mehriban Əliyeva Azərbaycan Mədəniyyət (1995) və Heydər Əliyev (2004) Fondlarının təsisçilərindən biri olub və hazırda onların rəhbəridir. O, 1996-cı ildə Azərbaycan mədəniyyətinin geniş təbliğ olunması məqsədilə çap olunan “Azərbaycan - İrs” jurnalını təsis edib.
Mehriban Əliyeva Azərbaycan, Rusiya, Fransa, Polşa, İtaliya və başqa ölkələrin orden və mükafatları ilə təltiflənib. O, həmçinin UNESCO-nun və ISESCO-nun Xoşməramlı səfiri adlarına layiq görülüb.
Mehriban Əliyeva 2017-ci il fevralın 21-də Azərbaycan Respublikasının Birinci vitse-prezidenti vəzifəsinə təyin edilmişdir. O, Azərbaycan tarixində bu vəzifəyə layiq görülmüş ilk qadındır.
