26 iyun 1918-ci il tarixli qərarla Müsəlman Korpusunun adı dəyişdirilərək Əlahiddə Azərbaycan Korpusu adlandırıldı və beləliklə, AXC-nin ilk hərbi hissəsi yaradıldı. Bunun ardınca ölkədə hərbi mükəlləfiyyət - orduya çağırış haqqında hökumət tərəfindən fərman verildi. Bu qərarlar müsəlman Şərqində ilk demokratik hökumətin öz ordusunu yaratmasına hüquqi əsas verdi.
1 avqust 1918-ci ildə Azərbaycanın Hərb Nazirliyi təsis olundu, ilk müdafiə naziri isə Xosrov bəy Sultanov təyin edildi. 1919-cu ildə isə Bakıda ilk hərbi parad keçirildi. 1918-1920-ci illərdə general Səməd bəy Mehmandarov, Əliağa Şıxlinski və digər hərbçilərin rəhbərliyi ilə AXC-nin yüksək döyüş qabiliyyətli, hərbi hazırlığa malik Milli Ordu hissələri formalaşdırılmışdı. Lakin Azərbaycanın bolşeviklər tərəfindən işğalından sonra ordu quruculuğu sahəsində görülən işlər dayandırılmışdı. [Səbuhi Məmmədov. 26 İyun – Silahlı Qüvvələr Günü. Xalq qəzeti.- 2016.- 26 iyun.- S.4.]
Azərbaycan dövlət müstəqilliyini bərpa etdikdən sonra, 9 oktyabr 1991-ci ildə Azərbaycan ordusunun yaradılması barədə qərar qəbul edildi. Həmin tarix Azərbaycan Respublikası Silahlı Qüvvələri Günü elan olundu. 1998-ci ildə həmin qərar dəyişdirilmişdir və 26 İyun Azərbaycan Respublikası Silahlı Qüvvələri Günü elan edilmişdir. [https://e-qanun.az/framework/6681] [https://e-qanun.az/framework/3682]
Bu gün Azərbaycan Milli Ordusu Hərbi Hava və Hava Hücumundan Müdafiə, Hərbi Dəniz və Quru qoşunlarından ibarətdir. Müstəqil Dövlətlər Birliyi çərçivəsində Azərbaycan hava hücumundan müdafiə qüvvələrinə malik ən güclü ölkələrdən sayılır. [http://yap.org.az/az/view/news/62879/azerbaycan-ordusu-sadece-olkemizde-deyil-butun-cenubi-qafqazda-sulhun-esas-teminatchisidir]
