Milyonçu və xeyriyyəçi H.Z.Tağıyev 200 (bəzi mənbələrə görə 185) il əvvəl bu gün anadan olub. O, Bakıda başmaqcı ailəsində dünyaya gəlmişdir. O, balaca yaşlarında anasını itirib. Balaca Zeynalabdin tikintidə çalışır, gündə 5-6 qəpik pul qazanırdı, 15 yaşına çatdıqda o, bənnaçı sənətini mənimsəyir.
1873-cü ildə Bibiheybətdə şəriki ilə 9.000 rubla torpaq sahəsi alan Tağıyev düz 5 il öz əziyyətinin bəhrəsini gözləmişdir. Nəhayət, 1878-ci ildə neft fontan vurmuşdur. Beləliklə, zamanla Hacının neft şirkəti 20 milyon rubl dəyərinə çatmışdır.
Tağıyev müdrik və xeyirxah biri idi. Onu Parisdə belə tanıyır, necə biri olduğunu yaxşı bilirdilər.
Belə ki, bir gün Hacı Parisə yola düşüb və orada keçirilən hərracda iştirak etmək istəyib. Ancaq bir axşam 3 nəfər gələrək deyir ki, sizin hesabınıza 100.000 manat pul köçürəcəyik, hərracda iştirak etməyin sizin təkcə adınız hərracda bizim işləri alt-üst edəcək. Bu hadisədən sonra Tağıyev belə demişdir:
“Gördün, birdən-birə yüz min manatı necə qazandım? Atalar boş yerə deməyib ki, pulu pul qazanar, igid oğul palçıq tapdalayar”.
Hacı Zeynalabdin Tağıyev 1 sentyabr 1924-cü ildə 86 (bəzi mənbələrdə 101) yaşında Bakıda, Mərdəkanda yerləşən bağ evində vəfat etmişdir. İradəsinə uyğun olaraq, onu Mərdəkandakı “Pirhəsən” pirində, Bakı axundunun – Molla Abuturabın ayaqları altında dəfn ediblər.
