Aida Nəsir qızı İmanquliyeva 10 oktyabr 1939-cu ildə Bakı şəhərində, ziyalı ailəsində anadan olub.
O, 1957-ci ildə Bakının 132 nömrəli orta məktəbini, 1962-ci ildə indiki Bakı Dövlət Universiteti Şərqşünaslıq fakültəsinin ərəb filologiyası bölməsini bitirib. İmanquliyeva bu ali məktəbin Yaxın Şərq xalqları ədəbiyyatı tarixi kafedrasında aspirant olub, həmçinin keçmiş SSRİ EA Asiya Xalqları İnstitutunun aspiranturasında oxuyub. 1966-cı ildə İmanquliyeva Azərbaycan EA Şərqşünaslıq İnstitutunda əmək fəaliyyətinə başlayıb.
İlk şərqşünas qadın olan Aida İmanquliyeva üç monoqrafiyanın və 70-dən çox elmi məqalənin müəllifidir, Şərq filologiyası sahəsində yazılmış bir çox elmi əsərlərin redaktorudur.
O, 1991-ci ildə Şərqşünaslıq İnstitutunda direktor vəzifəsinə təyin olunub. Aida xanım elmi işlərlə yanaşı, pedaqoji fəaliyyətlə də məşğul idi. O, Azərbaycan Dövlət Universitetinin Şərqşünaslıq fakültəsində ərəb ədəbiyyatından dərs deyirdi.
Aida İmanquliyeva 19 sentyabr 1992-ci ildə vəfat edib və Birinci Fəxri xiyabanda dəfn edilib.
Mənbələr:
