Necəsiniz, kinosevərlər? Filmə baxmaq istəyirsiniz? Bu dəfə sizə şoudan yox, gerçək həyatdan danışmaq istəyirik. İndi haqqında bəhs edəcəyimiz kino real hadisələr əsasında çəkilib.
“Vəhşi şəraitdə” (2007)
Bioqrafiya, drama
İMDB: 8.1/10
Vaxt: 2 saat 28 dəqiqə
Təsəvvür edin, 24 yaşdasınız, Harvard universitetinə daxil olmaq şansına sahibsiniz, ailəniz sizə avtomobil hədiyyə edir, şəxsi bank hesabınızda isə 24.000 ABŞ dolları var. İdeal bir həyatdır, elə deyilmi? Ancaq Kristofer Makkendls belə düşünmür. Maddiyyət onu maraqlandırmır, bu dəyərlərlə yaşayan cəmiyyəti də başa düşmür. Gənc oğlan təbiətdə yalnız və azad yaşamağı arzulayır və belə də edir.
O, bütün pulunu xeyriyyəyə xərcləyir, sənədlərini yandırır, özünə yeni ad seçir və avtostopla Alyaskaya doğru yola düşür. Təhlükəli səyahətə çıxan qəhrəmanı nələr gözləyir?!
Kristofer Makkendlsin hekayəsini öyrənən insanlar 2 yerə bölünür. Bəziləri onun saf və ağılsız olduğunu düşünürlər, digərləri isə gəncin cəsarətli və azad ruhunu vurğulayırlar.
Bəs sizcə bu addımı necə adlandırmaq olar?
Rejissor Şon Penn 1996-cı ildə səyahətçinin yazıları əsasında nəşr olunan kitabı 1 gecədə oxumuş və o qədər heyrətlənmişdir ki, dərhal bu haqda kino çəkmək qərarına gəlmişdir. Lakin gəncin ailəsini razı salmaq onun 10 ilini almışdır.
Film Kristofer Makkendlsin səyahət boyunca olduğu gerçək lokasiyalarda lentə alınıb. Çəkiliş heyəti Alyaskaya ilin hər fəslini lentə almaq üçün 4 dəfə səfər edib.
Səyahətçi Alyaskada, ən yaxın yaşayış məntəqəsindən 50 km aralıda, tərk edilmiş bir avtobusda yaşayırdı. Kinonun premyerasından sonra həmin avtobusu görmək üçün yüzlərlə insan təhlükəli meşələrə üz tuturdu. 13 il ərzində dövlət orqanları dəfələrlə xilasetmə əməliyyatları keçirmişdir, bir neçə insan çayda boğularaq ölmüş və ya itkin düşmüşdür. 2020-ci ildə hakimiyyət tərəfindən avtobus helikopter ilə götürülərək naməlum istiqamətdə aparılmışdır.
Film 15 milyon ABŞ dolları büdcə ilə 56 milyon ABŞ dollarından çox gəlir əldə etmişdir. O, 1 kateqoriya üzrə nüfuzlu “Qızıl Qlobus” mükafatını qzanmışdır.
[URIS id=69352]
