Axşamınız xeyir, əziz izləyicilər. Bakuplus.az komandası bu həftə də sizlər üçün maraqlı ola biləcək film haqda danışmaq istəyir. Demək olar, hər gün paytaxtda müxtəlif dələduzluqlar haqda xəbərlər eşidirsiniz və “başını başqa yönə işlətsə milyoner olar” deyə düşünürsünüz. Bu gün danışacağımız filmin qəhrəmanı başını dələduzluğa elə yönəltmişdir ki, 16 yaşında 5 peşə sahibi və milyoner olmuşdur.
Ad: “Bacarırsansa, məni tut”
Janr: bioqrafiya, komediya
Reytinq: 8.1/10
Vaxt: 2 saat 21 dəqiqə
Film real hadisələr əsasında çəkilib.
16 yaşlı Frenk Ebiqneylin ailəsi çətin günlərdən keçir. Atasının borclarına görə onlar balaca evə köçməyə məcbur olurlar. Bir müddət sonra isə valideynlər ayrılmaq qərarı verirlər. Yeniyetməni məhkəmə zalına gətirərək ana və atasının arasında seçim etməyi tələb edirlər. Bununla razı olmayan Frenk evdən qaçır və özbaşına yaşamağa başlayır.
Qanuni yollarla pul qazanmaq onun üçün çətin olur. Yetkinlik yaşına çatmayıb deyə ona çox az maaş verirlər. Belə davam edə bilməyəcəyini anlayan yeniyetmə öncə sənədindəki yaşı dəyişir və dünyanın ən böyük dələduzlarından birinə çevrilməyə başlayır.
16 yaşlı Frenk Ebiqneyl saxta pilot sənədi düzəldərək 200-dən artıq pulsuz uçuş edib, özü də pilot kabinəsində. Həkim kimi 7 təcrübəçiyə rəhbərlik edib, vəkil və müəllim olub, Harvard və Berkli Universitetlərini bitirib və saxta çeklər düzəldərək 8 milyon ABŞ dollarını nağdlaşdırmağı bacarıb.
İnterpol tərəfindən ən çox axtarılan şəxslər arasında olan Frenk Ebiqneyl tutulandan sonra ABŞ hüquq-mühafizə orqanları ona iş təklif edib. Həbsxanada yatmaq yerinə o, dələduzları tapmaq və qanunlarındakı boşluqları bağlamaqda FTB-yə (FBİ) kömək edib.
Hazırda Frenk Ebiqneylin 74 yaşı var. O, müxtəlif kitablar yazır və şəxsi konsaltinq şirkəti ilə qanuni milyonçu olmağı bacarıb.
Qəhrəmanın bioqrafik kitabı əsasında çəkilən filmin 164 milyon ABŞ dolları büdcəsi olub. Kinonun dünya üzrə qazancı 352 milyon ABŞ dollarını keçib.
Tags: leonardodicaprio, tomhanks, catchmeifyoucan, kino, film, gününfilmi
[URIS id=77943]
