Bu dəfə süjet xətti və aktyor oyunu ilə çoxlarının rəğbətini qazanan “Pərdə” trilogiyası barədə danışacağıq.
Filmlərin hər birinin ssenarilərinin yazılmasında rejissor Emil Quliyev özü də iştirak edib. Ailə-məişət problemləri, mentalitetin insanlar arasında yaratdığı sədd, xəyanət kimi həyatdan götürülmüş mövzular əsas müzakirə obyektidir.
“Pərdə”nin 1-ci hissəsində atasının başqasına verdiyi qız sevdiyi oğlanla qaçır. Əsas hadisələr bundan sonra başlayır.
“İkinci Pərdə” filmində süjetin əsasını xəyanət motivi təşkil edir. Dostun, arvadın, ərin xəyanəti… Timanın arvadının yaxın dostu Ariflə eşq macərası yaşamasını öyrənməyi filmin kulminasiya nöqtəsidir.
“İkinci pərdə” filmi real həyatda Emil Quliyevin dostunun başına gəlmiş hadisədir.
Trilogiyanın son əsəri olan “Sonuncu pərdə”də bəzən maddiyyatın dostluqdan, vicdandan, insanlıqdan və hətta məhəbbətdən belə üstün olması tamaşaçılara çatdırılır.
Ssenarilər bir-birindən fərqlənsə də, hər 3 film cəmiyyətdə aktual xarakter daşıyan məsələləri əks etdirir.
Dünya filmlərinin yer aldığı nüfuzlu reytinq platformasında (İMDb) “Pərdə” 10 üzərindən 8.2, “İkinci Pərdə” isə 8.5-lə qiymətləndirilib.
İxtisasca rejissor olmayan Emil Quliyev müsahibələrinin birində deyir: “Hər yerdə pərdə var. Cəmiyyət fikri ilə yaşamaq pərdədir. Ata ilə oğul arasında pərdə, dostlar arasında pərdə. Mən istəyirəm ki, hər kəs öz fikri ilə yaşasın. Pərdələr imkan vermir yaşamağa”.
[URIS id=77041]
