Yeni ilə sayılı günlər qalıb və hər kəs öz yaxınlarına hədiyyə almağa tələsir. Bu bayram bütün dünya üçün xüsusi əhəmiyyət daşıyır. Növbəti ilə yeni məqsədlərlə girməklə yanaşı, hər kəs öz evində, iş yerində və küçələrdə Yeni ilin möhtəşəm ab-havasını yaratmağa çalışır.
Əlbəttə ki, sevimli kinolarımızı da unutmaq olmaz. Hər il Yeni il ərəfəsində uşaqlıq filmlərimizi tapmaq üçün televizorlara və ya internetə üz tuturuq. Biz də bu şansı əldən vermədik və həmin filmlərdən biri haqda danışmağa qərar verdik.
Ad: “Qrinç: Milad oğrusu” (2001)
Janr: fantastika, komediya, ailəvi film
Reytinq: 6.2/10
Vaxt: 1 saat 44 dəqiqə
Nağıllar şəhəri Ktoqradda Qrinç adlı bir nəfər yaşayır. Uşaq vaxtından onu bu şəhərdə sevmirdilər. Və buna görə də hamıdan küsən Qrinç şəhərin yanındakı dağın başına köçür. Milad bayramı onun ən nifrət etdiyi şənlikdir. Və hər il o, ürək ağrısı ilə şəhərə, şənlənən insanlara baxır. Bir gün Qrinç bu əzaba son qoymağa qərar verir və Ktoqrad sakinlərinin Milad bayramını məhv etməyə hazırlaşır.
Əfsanəvi personajlardan sayılan “Qrinç” uşaqlar üçün yaradılmış bir obraz idi. Və bu personajla böyüklərə yönəlmiş film çəkmək çətin olsa da, yaradıcılar bunu etməyi bacarıb. Filmdə insanların bayramın əsl mənasını unutduqları barədə danışılır. Belə ki, bir yerdə əylənmək, bayramın dadını çıxarmaq yerinə, insanlar bütün xoşbəxtliyi hədiyyə və maddiyyatda görürlər.
Cim Kerri həmişə olduğu kimi, möhtəşəm performans göstərib. Onu eybəcər, yaşıl məxluqa çevirmək 2 saat vaxt alırdı. Aktyor həmin kostyumun içində 12-14 saat qala bilməsi üçün dözümlülük dərsləri almışdır. Nəticədə qrim Oskara layiq görülmüşdür.
2001-ci ildə çəkilməsinə baxmayaraq, “Qrinç” bu gün də bizim ən sevimli personajlarımızdan biri sayılır. Uşaq vaxtı onu sevməsək də, razılaşın ki, indi ona bir az da olsa haqq veririk.
[URIS id=83561]
