Biz qərb ölkələrinin bəzi təbliğatlarını başa düşmürük. Məsələn, bir “nigger” sözünə görə həbs olunmaq, polis tərəfindən öldürülən cinayətkarın sırf qaradərili olduğu üçün hay-küy salınması bizə qəribə gəlir. Qərbin bu mövzulara həssas yanaşması onların keçmişi ilə bağlıdır. Bir zamanlar zəncilərə qarşı olan münasibət o qədər bərbad idi ki, bu stereotipləri birdəfəlik qırmaq üçün bu qədər böyük təbliğat aparılır. Qaradərililərin hansı əzablardan keçdikləri, necə çətinliklərlə üzləşdikləri haqda bəhs edən kitablar yazılır, məqalələr dərc olunur, filmlər çəkilir.
Son bir neçə ildə bu mövzuda insanların ürəklərinə toxuna bilən lentlərdən biri də “Yaşıl kitab” filmidir.
Ad: “Yaşıl Kitab”
Janr: bioqrafiya, komediya, drama
Reytinq: 8.2/10
Vaxt: 2 saat 10 dəqiqə
Film real hadisələr əsasında çəkilib.
Sən Amerikanın ən məşhur pianistlərindən birisən. İnsanlar səni dahi adlandırır, səni dinləmək üçün sərvət ödəyirlər, ancaq səninlə nəinki bir masada, heç bir otaqda belə olmaq istəmirlər. Xeyr, sən pis bir insan deyilsən, sadəcə dərinin rəngi qaradır. 60-cı illərin Amerikası məhz belə ideyalarla yaşayırdı və bu, tam normal sayılırdı.
Afroamerikalı məşhur pianist Donald Uolbric Şirli ABŞ-nin cənub ştatlarına qastrollara getməyə hazırlaşır, ancaq “rəngli” olduğu üçün bu səyahət həyati təhlükə daşıyır. Buna görə də o, Toni adlı italyan mühafizəçini işə götürür. İrqçiliyin çiçəkləndiyi ölkədə ağdərili insanın “zənciyə işləməsi” birtərəfli qarşılanmır.
Don Şirli qaradərili olmasına baxmayaraq, yetərincə imkanlı birisidir. Buna görə digər zəncilər ona yad baxırlar. Ancaq ağdərililər də onunla münasibət qurmaq istəmirlər.
Həmin dövrlərdə quldarlıq artıq yox idi, ancaq ağlar bununla razılaşa bilmirdilər. Onlar qaradərili insanlarla bir restoranda yemək, hoteldə yaşamaq, hətta bir tualetə belə getməkdən imtina edirdilər.
Buna görə də qaradərililər üçün xüsusi “Yaşıl kitab” yaradılmışdır. Burada zəncilərin daxil ola biləcəkləri məkanlar haqda məlumatlar var idi.
2018-ci ilin ən yaxşı kinosu seçilən film 3 Oskar mükafatına layiq görülüb. Kinolent 23 milyon ABŞ dolları büdcə ilə çəkilmiş və 321 milyon ABŞ dolları qazanmağı bacarmışdır.
[URIS id=79862]
