Muğanlı-İsmayıllı istiqamətində xidməti yolda hərəkətə qoyulan məhdudiyyət aradan qaldırılıb. Bu haqda bu gün, 30 iyun tarixində Bakuplus.az Azərbaycan Avtomobil Yolları Dövlət Agentliyinə (AAYDA) istinadən məlumat verir.
Bildirilib ki, ötən axşam Muğanlı-İsmayıllı yolunun 2-ci kilometrində aparılan tikinti işləri ilə əlaqədar salınan müvəqqəti yolda sürüşmə qeydə alınıb.
“Dərhal sürüşmə qeydə alınan hissənin bərpası üçün əraziyə Azərbaycan Avtomobil Yolları Dövlət Agentliyinin xüsusi texnikaları və canlı qüvvəsi səfərbər olunub.
Avtonəqliyyat vasitələrinin təhlükəsiz hərəkətini təmin etmək məqsədilə Muğanlıdan İsmayıllıya və əks istiqamətə avtonəqliyyat vasitələrinin hərəkəti bir neçə saatlıq məhdudlaşdırılıb, sürücülər alternativ olaraq Bakı-Şamaxı-Yevlax avtomobil yoluna (Ağsu aşırımı) yönəldiliblər.
Gecəboyu aparılan işlər nəticəsində sözügedən ərazidə səhər saatlarında avtonəqliyyat vasitələrinin hərəkəti qismən bərpa olunub. Hazırda ərazidə sürüşmənin fəsadlarının tam aradan qaldırılması istiqamətində işlər davam etdirilir.
Qeyd edək ki, sürüşmə əsas yolda deyil, müvəqqəti salınmış xidməti yolda baş verib. Əsas yol hesab olunan Bakı-Şamaxı-Muğanlı-İsmayıllı-Qəbələ avtomobil yolunun Muğanlı-İsmayıllı-Qəbələ hissəsinin yenidən qurulması hazırda davam edir.
Bir daha yaranan müvəqqəti narahatlığa görə üzr istəyirik”, - deyə agentlik bildirib.
