Bakı restoran və kafelərlə həmişə bol olub. Paytaxtımızda hər zövqdə və konseptdə kafe tapa bilərsiniz. Burada olan güclü rəqabət sahibkarlardan kreativ olmalarını tələb edir. Sakinlərimiz isə həmişə standartlardan kənar olan istirahət guşələri axtarırlar. Bunların hamısını nəzərə alaraq Bakuplus.az komandası Bakıdakı qeyri-adi iaşə obyektlərinin axtarışına çıxdı və sizin üçün özünəməxsus konsepti olan 6 kafe tapdı.
“Project Flat” - mənzildən yaradılan kafe
Lahiyənin müəllifi Yaqub Zeynalzadə İtaliyada Mişlen ulduzlu restoranlardan birində aşpaz olub, lakin bir müddət sonra Azərbaycana qayıdıb. Bakıya qayıdan gənc öz mənzilində restoran yaratdı. Bu müəssisənin diqqətçəkən cəhəti ondan ibarətdir ki, menyu yalnız yerli məhsullardan yaradılan müəllif yeməklərindən ibarətdir. Aşpaz hər ay öz mikroavtobusu ilə Azərbaycanın kəndlərini gəzir və lazımi inqrediyentləri şəxsən alır.
“Teayoume” - Asiyanın müasir ruhunu canlandıran kafe
25 yaşlı çinli xanım Huiro Jen azərbaycanlı ilə ailə qurub, Bakıya köçüb və burada uğurlu biznes qurub. Onun Çin çay içkiləri və Asiya şirniyyatları təklif edən “Teayoume” kafesi gənclərin sevimli məkanlarından birinə çevrilib. Burada müxtəlif çayları, o cümlədən “yeni nəsil” pendirli və meyvəli çaylar və özlü və məşhurluğu qazanan yapon şirniyyatı olan "moçi" satılır.
“Purple K-pop cafe” - “BTS”-in fanatlarının məkanıdır
K-pop (Koreya pop musiqisi) ətrafında eyforiya Bakıya da çatıb. Özlərini "army" adlandıran Koreyanın "BTS" oğlan qrupunun pərəstişkarları bu ölkənin müasir mədəniyyətinə həsr olunmuş kafe yaradıblar. Burada təkcə Koreya mətbəxi deyil, həm K-pop musiqiləri, həm də “BTS” qrupuna həsr olunmuş merçandayzinq məhsullarını almaq olar.
“Emalatkhana art space & cafe” - əl işlərindən yaradılmış kafe
Gənclərin öz əlləri ilə yaradılmış, hər bir əşya, stol və stula can qoyulan məkanlardan biri. Kafeyə daxil olan kimi “özümüzünkülər” atmosferini hiss edəcəksiniz. Köhnə əşyalara yeni həyat vermək, gənclərin özlərinəxas dizaynlar yaratması və isti mühit sizin diqqətinizi cəlb edəcək. Yayda kafenin damı da istifadəyə verilir, açıq havada canlı konsertlər təşkil olunur.
“90lar cafe” - Doxsanların uşaqları üçün
Ötən əsrin 90-cı illəri hər birimiz üçün xüsusi xatirələrlə yadda qalıb. “Nöyüt”lə yanan lampalar, kasetli radiolar, yanğınsöndürənlər kimi səs çıxaran saatlar. Bu əşyaları gördükdə nostalji hisslərə qərq oluruq. “90lar cafe” məhz bu atmosferi yaratmağı bacarıb. Kafedə internet yoxdur, mütəmadi olaraq şam işığı altında Şam gecələri təşkil olunur.
“Music Nest cafe” - musiqiçilərin məkanı
Burada ürəkaçan və özünüzü rahat hiss edəcəyiniz mühit, bağça üslubunda yaradılmış eyvan, hətta musiqi ifa edə biləcəyiniz guşə tapa bilərsiniz. Xüsusi yaradılmış otaqda pianino və bir sıra simli alətlər var. Məkanda tək və ya dostlarınızla heç kimi narahat etmədən musiqi bacarıqlarınızı sınamaq mümkündür.
