Bakıda diş həkiminə gedən uşaq sedasiyadan sonra komaya düşüb. Bu haqda bu gün, 2 mart tarixində Bakuplus.az Oxu.az-a istinadən xəbər verir.
Sosial şəbəkələrdə 11 yaşlı Xadicə adlı qızın doqquz gündür komada olması haqda məlumat yayılıb. Uşağın atasının sözlərinə görə, qızına anesteziya edilməməsini tapşırdığı halda, stomatoloq öz qərarı ilə bunu etməyi lazım bilib. Anestezioloqun məsuliyyətsizliyi səbəbindən uşağın beynində oksigen çatışmazlığı yaranıb və o, komaya düşüb.
Məsələ ilə bağlı stomatoloq Bəhruz Rüstəmov açıqlama verib. Həkim bildirib ki, Xədicə Zamin qızı Babazadənin müalicəsi ilə bağlı müraciət olunub. Daha sonra, 21 fevral tarixində azyaşlı həkimin qəbuluna yazılıb.
“Öncədən Xədicənin valideyni sedasiya ilə bağlı istəklərini bildirdiyinə görə təyin olunmuş vaxtda anestezioloqa da vaxt bildirilmişdi və o da dəvət olunmuşdu. Həmin tarixdə hər iki valideyni uşağı ortopantomoqram rentgeni ilə birlikdə işlədiyim klinikaya gətirdi. Subyektiv və obyektiv müayinələrini etdikdən sonra ağız boşluğunda görülməli prosedurlar haqqında məlumat verdim.
Pasiyent ümumi intubasion anesteziyada olduğuna görə yerli anesteziyaya ehtiyac yox idi və olunmadı.
İlk gördüyüm iş dişlərdən birinin restavrasiyası idi. Müalicə təxminən 15 dəqiqə çəkdi. Daha sonra 21-ci dişin endodontik müalicəsinə başladım. Kök kanallarının mexaniki, medikamentoz işlənməsindən sonra onu doldurdum. Prosedurun sonunda anestezioloq mənə işi təcili dayandırmalı olduğumu bildirdi. Mən işi saxladım və prosedur otağında olan anestezioloq pasiyentin vəziyyətini dəyərləndirdikdən sonra digər anestezioloq-reanimatoloqları prosedur otağına təcili çağırdı. Bundan sonra mən heç bir stomatoloji müdaxilə etmədim. Anestezioloq-reanimatoloqlar isə xəstənin intensiv müalicəsini davam etdirmək üçün işlədiyimiz klinikanın reanimasiya şöbəsinə yerləşdirdilər”, – deyə Rüstəmov qeyd edib.
Qeyd edək ki, həkimlər Xədicənin vəziyyətinin kritik olduğunu, ayılsa belə, ömürlük yatağa bağlı qalacağını bildiriblər.
